Blog

De entre todas as tendencias que vemos circulando no noso entorno e asumindo que algunhas delas constitúen un lugar común, gustaríanos seleccionar para este 2026 as tres tendencias coas que nos identificamos e que aínda non son tan comentadas.

Estas tres tendencias son:

-Simplificación e hibridación

-Creación de comunidade

-Ritualización

RITUALIZACIÓN

O filósofo coreano Byung Chul Han advírtenos ao longo da súa obra de como a sociedade foi perdendo os rituais que conferían significado e valor ao tempo, e como ese tempo pasa a  confundirse cada vez máis entre si, como unha masa amorfa sen principios nin finais, incrementándose paradoxicamente o medo a perdelo.

Lembremos que nas sociedades que nos precederon, o tempo estaba perfectamente pautado e organizado en función dos ritmos da natureza. Traballábase coa luz do sol e descansábase coa ausencia de luz. O clima pautaba cando eses traballos se concentraban maioritariamente no interior ou no exterior das casas. A relixión establecía os días de descanso. As festas tiñan un carácter eminentemente agrícola, para pedir á natureza boas colleitas ou para celebrar todo o colleitado. Coa tradición, cada momento do ano comportaba o seu propio ritual.

Pola contra, cando as tradicións perden forza, eses mesmos rituais perden forza, e o tempo deixa de estar tan connotado de significacións coma antes. Isto contribúe a que as persoas experimenten unha sensación de vacío existencial, e con ela intensifícase a necesidade de atopar novas fontes de creación de significado e simbolismos.

As empresas máis volcadas no coñecemento da psique humana captan isto de inmediato e comprenden a necesidade de ofrecer unha ritualización do tempo alternativa ou complementaria respecto da existente. Isto acontece, por exemplo, cando unha empresa organiza un evento nas mesmas datas de xeito continuado. A partir dun certo punto, as persoas asistentes relacionan ese momento do ano a el e vencellan ese tempo ás súas implicacións e significados. Ou tamén acontece cando as empresas tematizan a súa oferta arredor das festividades tradicionais do ano, como poden ser o nadal, o entroido ou o samaín.

Daquí en diante, esta ritualización consciente por parte das empresas vai encamiñada a gañar maior importancia e formar parte dunha estratexia empresarial máis ampla que busca ofrecer universos de experiencias, produtos e servizos que gocen de auténtica relevancia na vida das persoas.

Paralelamente isto pode conectarse coa tendencia cada vez maior a viaxar a un lugar polas experiencias que ofrece e non tanto polo atractivo turístico, entendido de xeito clásico, do lugar de destino. Aquí agruparíanse as viaxes que se fan para asistir a un evento, a un espectáculo, a un festival, a un congreso, a unha feira, a unha competición, etc. que, ao ser desgranadas, responden a esa mesma necesidade de conferir sentido e significado ao tempo.